Hostel 到起跑位置不遠, 行大約二十分鐘就到, 開跑時間是12pm, 當然大約早一小時到達會場望下坐下鬆下同參選下廁所. 拿, 係有廁所,仲要係好多廁所, 廁所係有既, 係有既.. etc... 同埋多人排隊去廁所. 明明出門口已經好似屙晒, 去到開跑前點都要放低多少先安樂, 有番安全感. 之後在人造草地球場稍作休息, 跑幾步鬆下, 左小腿仍然有點不自然, 如無意外, 三十公里後應該會抽抽地 sosad.
11:40am 步入起跑區, 已經好多人, 個個都高我成個頭, 又有好多鋼條阿叔阿嬸, 唔同東京馬拉松, 冇乜人 cosplay, 最勁果個應該都係啤酒人. 等下等下終於到第二組 12:10pm 開跑, 天氣超好, 15/16度, 有太陽有風, 又乾, 真心舒服.
其實一開始我打算 6:30 -> 6:15 -> 6:00 -> 5:45 配速, 同跟住 4:15 / 4:30 個 Garmin pacer 氣球, 不過結果一開跑實在太興奮太舒服, 變左 5:55 -> 6:00 -> 6:30 -> 7:xx sosad.... 其實頭 25km 真係 ok, 自己都知會奶野, 跑過都知, 28km 以上先真章....
沿途有好多好多市民打氣, 大叫 "Heja! Heja! Heja!"意思係 "Cheer up / 加油", Heja 發音係 "唏呀" 咁, 即係好似一路跑一有家燕姐同你皆大歡喜 "唏呀唏呀唏~~", 真係充滿力量. 其實真正加到油係同啲觀眾細路 Hi 5, 拍完掌真係又可以有力跑多一段.
果陣個雙腿都好輕, 步頭都好爽....
頭 25km 真係跑得好正.....
不過到 27, 28km, 大約跑到 Noriska museet / Skansen 出面, feel 到唔對路, 左脾四頭肌開始有不尋常跳動, 抽下彈下咁, 都冇辦法, 唯有放慢跑. 跑到約 34km, 到左 "Vasterbron" 係一條大橋, 其實之前9km已經過左, 而家跑第二轉, 不過係34km, 就開始黎料, 好難得見到人噴鎮痛劑, 噴晒兩隻腳又繼續頂落去. (比起三隧三橋真係小兒科, 不過係自己今次訓練得衰)....
去到後段36/37km, 個人都漠漠地, 隊埋最後一包 power gel, 繼續上路, 最後幾 k, 躝都躝到返去啦, 況且果陣時間都係未夠四個鐘 .... 見有隊香港友, 跑快兩步去打聲招呼, 互相加下油 :)
好啦, Heja Heja Heja 捱多差唔多一個鐘, , 跑跑下都唔見晒班 pacing team, 想搭順風車都冇. 最尾幾公里又真係要跑一陣又抽停埋一邊拉下筋, 基本上 feel 到一跳起就會雙腳大腿小腿幾舊肌肉一齊瘋狂抽筋... 不過又咁, 最尾兩公里, 唔知點樣 chok 下 chok 下又 chok 到個跑姿唔會有抽筋感覺, 又可以順利咁跑到終點.... 見到終點運動場好有氣氛, 不過又冇乜激動, 總算抽住完成人生第三隻馬. :)
跑完向行李區係有條樓梯, 個個都死下死下咁.... 呢幾級真係好金... 有啲朋友要倒後行先得 sosad.
個獎牌好重手, 幾靚 :) 影番張相, 衰衰地差唔多4:45先搞掂, 私人醒多 3km ;)
===================================================================
斯德哥爾摩馬拉松 2016 - Part 1
斯德哥爾摩馬拉松 2016 - Part 2
斯德哥爾摩馬拉松 2016 - Part 3
===================================================================
No comments:
Post a Comment