第七屆富士山馬拉松 2018 part 1

休戰一年, 今年復出就跑富士山馬拉松. 上一個blog post已經係兩年前. 揀富士山馬拉松主要是年初同朋友們發姣發蠆話搵隻馬去跑, 見到富士山馬拉松好似唔錯又靚, 又唔洗抽籤, 就揀佢啦, 結果最尾係被放飛機單拖去 sosad.

富士山馬拉松主要係圍住河口湖同西湖黎跑, 係唔洗跑上山. 叫得富士山馬, 咁全程都有一半時間係望住個富士山跑, 另外default係俾橙紅黃葉包圍住咁跑啦. (辛苦晒). 今年富士山馬係11月25日舉行, 溫度就由起跑果陣大約0度同中午猛太陽10度, 有太陽加呢個溫度係好舒服, 真心好彩好天氣.

今次復出, 其實練得唔好, tempo run 都只係5:40 pacing, 而長課就最多去到32km. 加上出賽前一個月好衰唔衰啲足底筋炎症狀發晒出黎, 腳版又痛, 腳踭又痛, 但係買晒機票酒店又放晒風話跑, 咁唯有頂硬上.

雖則話頂硬上, 其實出賽前一個月都係有用心安排過. 咁傷患出現之後, 每晚我都會用腳抓毛巾, 用網球壓住痛處, 由之前快鞋sky sensor japan 換番對保護性較高既 gel-feather glide. 之後tempo run 就keep住 5:40 pacing, 長課就 7:30 pacing, 跑完敷冰. 咁喺呢種低強度訓練, 啲痛係會舒緩到, 當然完成賽事後要抖番一頭半個月啦.

講番賽事之前一日既expo, 其實都係幾個camp 砌埋, 人手搞, 冇咩特別野買. 1pm先開始拎選手pack, 人手派, 排晒長龍 (好彩一早去排定隊). 早去就趁唔多人影下相, 食下野 (都叫有架快餐車賣串燒).

本來都想買tee, 但係件tee實在太頹, 一張燙畫加地圖, 冇乜誠意. 其他就係nike, adidas, 等大牌子跑步用品, 都唔洗特登喺呢度買.

比賽當日情況, 下回分解.

第七屆富士山馬拉松 2018 part 1
第七屆富士山馬拉松 2018 part 2
第七屆富士山馬拉松 2018 part 3