Run Alan Run!: 第七屆富士山馬拉松 2018 part 2

馬拉松前一晚, 好多人都會失眠, 緊張, 驚乜驚物, 其實係正常. 就算訓唔著都唔洗驚, 因為根據小弟經驗, 就算失眠, 如果只係滋陰跑, 對之後一日影響不大. 不過今次我就好好訓, 因為實在太攰.

(有人話幅圖似中左化骨綿掌)

比賽當日一早6am就起身, 食個杯麵早餐, 放低啲野, 檢查裝備, 調整心理. 望出窗口, 初初都有啲擔心, 因為大霧, 起身望出去唔見富士山. 到8am出門口, 啲霧散, 要再講多次, 真心好彩好天.

酒店同起點/終點 "林作公園" 大約10分鐘路程, 早上溫度只有 0 度, 所以都要保暖. 最簡單都係著即棄雨褸, 之後跑一陣, 等啲熱困住喺雨褸裡面.

8:40am 開幕禮, 有一段係有人唸經 (我估係祝福跑手, 祈求比賽安全順利等). 到9am, 正式開始, 我地啲慢腳當然等多幾分鐘先到我地啦. 起跑都係成堆人慢慢咁行, 擺pos影相, 我就睇住隻表, keep住慢跑, 唔好俾自己快.

富士山馬拉松重點係風景怡人, 一半時間都可以望住個富士山跑, 周圍default 紅葉, 加埋天朗氣清, 冇得輸.

介紹番個路線, 起點終點都係林作公園, 前半都係圍住河口湖, 經過八木崎公園, 河口湖大橋等, 每4-5km就有水站, 補給還可以. 沿途唔似東京馬咁多人打氣, 都係久唔久會一group人打下氣, 打下鼓. 辛苦位係大約22km, 會有大約1km上100m, 咁作為負傷既我, 我選擇行上去, 無謂博老命. 果個位有一隊中學生男子組熱血應援團, 大大地支持打氣, 如果有狀態, 理應谷上去.

過左大上斜, 就係一片紅林, 西湖, 富士山等湖光山色. 由於果個位比較郊外, 所以冇乜人打氣, 有點荒涼唏噓, 唯有專心感受大自然氣息. 跑完西湖後, 去到30km, 有個大補給站, 不過為免肚脹飽得滯, 咁我都係食左半隻蕉, 同埋乘機行少少休息下. 之後去到大約33km落斜, 咁落大斜路就舒服啦, 應援團仍然做緊野, 咁梗係要跑埋同佢地擊掌啦. 跟住餘下10km都係重覆番開頭咁上下路線返去林作公園. 一直慢慢跑到終點, 順利完成賽事. (減番開跑幾分鐘, 約 5小時幾分搞掂)